ආහාර පිසින විට ඇයි අපි කුලුබඩු යොදාගන්නේ?

නිවසක ආහාර පිසින විට දුරට ඇදෙන සුවධ නිසාම ඒ ආහාරය බුදිනන් පුදුම කැමැත්තක් හිතේ ඇති වුණා. කොහොම වුනත් අපේ රටේ කුළුබඩු ඉතිහාසය ඉතින් දන්වානේ. සිංහලයන්ගේ ඉඟුරු හොයා ගෙන මලය රට සිට වෙළෛන්දෙක් අපේ රටට පැමිණි බව පාලි රසවාහිනියේ සදහන් වෙනවා.

කුලුබඩු යොදා ගන්නේ ඇයි...?

ආහාරවල පෙනුම..
නිකමට මෙහෙම හිතන්න. කහ ටිකක් නැතුව ආහාරයක් පිස ගත්තොත් එයින් ආහාරයට ප්‍රියතාවයක් ඇති වෙන්නේ නැහැ නේද?

ආහාර රසවත් වෙනවා..

නරක් වීම වලක්වා ගනන් පුලුවනි..
උදාහරණයක් විදිහට ගොරක වගේ දේවල් යොදා ගත්තාම ආහාර දින දෙක තුනක් ශීතකරණයක් නැතුවම කල් තබා ගන්න පුලුවනි.

ආහාර මෙලෙක් වෙනවා. දිරවීම පහසුයි. මේ ගැන දන්නවානේ…
මස් ,මාළු පිසින විට ගොරක, ගම්මිරිස් එඑකතු කරාම ජීරණ ආබාධ නොදැනීම වැලැක්වෙනවා.වෙනස් රස ඇති වෙනවා. මෙහෙම හිතන්නකෝ...මාළු මිරිසට වගේම ඇඹුල් තියලටත් පුලුවනි. එකම සංයෝග විවිධ විදිහට භාවිතා කරන්න පුලුවනි.

* කොත්තමල්ලි

තුන්දොස් සමනය කරන ගුණයෙන් යුක්ත කොත්තමල්ලි වමනය, ඔක්කාරය , සෙම්ප්‍රතිශ්‍යාව වැනි රෝග තත්වයන්ට ගුණදායක වේ. ආහාර රස ගැන්වීමේදී යොදා ගන්නා රස කාරකයකි. මස්, මාලු, නියඹලා වර්ග මැල්ලුම්, සුප් රසගැන්වීමේදී අනිවාර්යෙන්ම යොදා ගන්නා රස කාරකයක් වේ.

* සූදුරු

පිත සමනය වේ. ආහාර දිරවීම පහසු කරන අතර අජීර්ණ තත්වයන්හිදි සූදුරු කබලේ බැදගෙන වතුරේ දමා පානය කරයි. මැල්ලුම් මෙන්ම පිපිඤ්ඤා වැනි කිරට පිසින ව්‍යාංජන වෙනුවෙනුත් යොදා ගැනේ.

* මහදුරු

මුත්‍රාකාරක ගුනයෙන් යුක්තය. උදරාබාධයන්ට සුවය දන අතර ආහාර රුචිය වඩවයි. මෙයින් වහනය වෙන සුවඳ ආහාර වෙනුවෙන් වූ උත්තේජනය වර්ධනය කරයි. වැලිතලප, අලුවා, කිරි දොදොල් අතිරස වැනි රසකැවිලි වලටත් යොදා ගැනේ.

* ගම්මිරිස්

සෙම්රෝග තත්වයට ඉතා ගුණදායකයි. සිරුර උණුහුම් කරයි. මස් මාලු පිසින විට අනිවාර්යෙන්ම යොදා ගැනේ. බිත්තර ඔම්ලට්, සැන්විචස්, කට්ලට් , මැල්ලුම් වර්ග, සලාද ආදිය සකසන විට ගම්මිරිස් නොයොදාම බැරිය.

* අබ

රුධිර සංසරනයට ගුණ ලබා දෙන අබ, තෙල් පැසෙන විට එක් කර පුපුරවා ගත් විට රසයක් සහ සුවඳක් එක් වේ. සැන්ඩ්විච් පිලියෙල කරන විටත් අබ අඹරා ගෙන එකතු කරනු ලැබේ. අච්චාරු පිලියෙල කරන විටත් අබ යොදා ගැනේ.

* කරඳමුංගු සහ එනසල්

මෙය අප අතර බහුලව යොදන සුවඳ කාරකයකි. එයින් වහනය වෙන සුවඳ නිසා ආහාර රුචිය වර්ධනය වේ. අලුවා, වැලිතලප වැනි රසකැවිලි සකස් කිරීමේදි අතීතයේ පටන් අනිවාර්යෙන්ම යොදා ගන්නා ස්වභාවික සුවඳ කාරකයන් වේ.

* රම්‍පෙ

ආහාර පිසින විට රම්පෙ කැබැල්ලකින් වහනය වෙන සුවඳ ආහාර වෙනුවෙන් උත්තේජනය ඇති කරයි. බතට පවා රම්පෙ කැබැල්ලක් එක් කළවිට අමුතු සුවඳක් දැනේ. තෙමපරාදු කරන විට රම්පෙ කැබැල්ලක් සිහින්ව ලියා ගෙන එක් කෙරේ. සුප් පිලියෙක කරන විටත් රම්පෙ කැබැල්ලක් එක් කෙරේ. මස්, මාලු, පොලාස් වැනි ඇඹුලට පිසින දේ වෙනුවෙන් අනිවාර්යෙන්ම රම්පෙ අවශ්‍ය වේ.

* සේර

මස් ව්‍යංජන පිලියෙල කරන විට යොදා ගන්නා රසකාරයක් මෙන්ම සුවඳ කාරකයකි.

* කරපිංචා

ආහාර නිසා ඇති වෙන අජීර්ණය, බඩපිපුම, ආහාර අරැචියට සහනය ලබා දේ. තෙම්පරාදු කරන විට තෙල් පැසෙද්දී කරපිංචා කොල කිපයක් තෙ‍ලට දමා ගත් විට නිකුත් වෙන සුවඳ ආහාරය වෙනුවෙන් විශේෂ උත්තේජනයක් ලබා දේ.

* සියඹලා

ආහාරය වෙනුවෙන් ස්වභාවික ඇඹුල් රසය එක් කරන අතර මලබද්ධයට ගුණදායක වේ. අජීර්ණ මගහරවන ස්වභාවික කුලුබඩුවක් සේ විශේෂය.

* රතුළූණු

විස නසන ගතියෙන් යුක්ත රතුළූණු ආහාරයේ රසය පමණක් නොව ගුණයද වැඩි කරනු ඇත. සෙම් රෝගීන්ගේ සෙම බුරුල් කරන අතර යහපත් නින්දක් ලබා දෙයි.

* සාදික්කා

වටලප්පන්, පුඩිං වර්ග පිලියෙල කරන විට සාදික්කා ස්වල්ප ලෙසින් එක් කරනු ලැබේ. එය සුවඳ දනවන අතර කිරි ආහාරවලදී ඇති වෙන අජීර්ණ තත්වය සමනය කරනු ලැබේ.

* සුදුළූණු

වාතයට සහ සෙමට ගුණය. සිරුර උත්තේජනය කරන නිසා දරුවන් ලැබීමෙන් පසු මව්වරුන්ගේ ආහාරපාන වෙනුවෙන් යොදා ගැනේ. කොළ කැඳ මෙන්ම සාමාන්‍ය ලුණු කැඳ සහ පොල්කිරි කැඳ පිලියෙල කරන විට සුදුළූණු එක් කිරීමෙන් ගුණය මෙන්ම සුවඳත් දැනේ.

හැම දෙයකම පදමක්, ගණන් මිම්මක් තිබෙනවානේ. පමණට වඩා කුලුබඩු එකතු වුනොත්..

අක්මාවට අහිතකර විය හැකියි
මුඛයේ හා උගුරේ ශ්ලේස්ම පටලයන්ට හානි වෙනවා
දැවිලි ගතිය ඇති විම
අම්ලපිත රෝග තත්වයට හේතු වීම

එන්.ඒ.පි.සි